Туркияда 2016 йил 15 июль куниги давлат тўнтаришига уриниш пайтида президент Ражаб Тоййиб Эрдоғонга суиқасд уюштиришда айбланган ва халқаро қидирувда бўлган Б.К. исмли шахс қўлга олинди. Бу ҳақда TRT Haber хабар берди.
Туркия Ички ишлар вазирлиги маълум қилишича, у ФЕТО томонидан амалга оширилган тўнтаришга уриниш вақтида Мармарис шаҳрида Эрдоғон турган меҳмонхонага юборилган 37 кишилик гуруҳ таркибида бўлган. Б.К. собиқ капитан ва ҳарбий вертолёт учувчиси бўлиб, кейинчалик хизматдан четлатилган.
Тергов маълумотларига кўра, у суиқасд гуруҳининг озодликда юрган сўнгги аъзоси бўлган. У 1 август куни Афёнқараҳисор шаҳрида ўтказилган махсус операция давомида қўлга олинган.
Вазирликнинг билдиришича, Б.К.га президентга суиқасд уюштириш, давлат хизматчисини ўлдириш, Ҳарбий жиноят кодексини бузиш ҳамда қуролли босқинчилик каби айбловлар қўйилган.
