Олий Мажлис Қонунчилик палатаси депутатлари бугун, 4 август куни “Ўзбекистон Республикаси Президенти Администрацияси тўғрисида”ги конституциявий қонун лойиҳасини биринчи ўқишда қабул қилди.
Қонун лойиҳаси билан Президент Администрациясининг ҳуқуқий мақоми, асосий вазифалари, фаолиятини ташкил этиш тартиби ҳамда ваколатлари белгилаб қўйилмоқда.
Шунингдек, ҳужжатда Президент Администрацияси мансабдор шахслари, бошқарув ва хизматчи ходимлари фаолиятининг ҳуқуқий кафолатлари назарда тутилган.
Лойиҳада Президент Администрациясининг давлат органлари ва ташкилотларидаги комплаенс ҳамда коррупцияга қарши ички назорат тузилмалари билан ўзаро ҳамкорлигига оид нормалар ҳам акс этган.
Депутатлар мазкур конституциявий қонун лойиҳасини биринчи ўқишда маъқуллади.
Мазкур қонун лойиҳаси жорий йилнинг 25 июль куни кучга кирган Конституцияга киритилган ўзгартиш ва қўшимчалардан келиб чиққан ҳолда ишлаб чиқилган.
Эслатиб ўтамиз, 2023 йил 1 майдан Ўзбекистон Республикаси Конституциясининг янги таҳрири кучга кирган эди. Жорий йилнинг 25 июль куни эса унга илк бор ўзгартиш ва қўшимчалар киритилди.
Хусусан, “Тошкент халқаро молия маркази тўғрисида”ги Конституциявий қонун билан Конституциянинг бир қатор моддаларига ўзгартиш ва қўшимчалар киритилди. Улардан бири Конституциянинг 109-моддасига тааллуқли бўлиб, унга мувофиқ, Ўзбекистон Республикаси Президенти ўз ваколатларини ташкилий, ҳуқуқий ва таҳлилий жиҳатдан таъминлаш мақсадида Президент Администрациясини шакллантириши ҳамда унинг раҳбарини тайинлаши белгиланди.
Шунингдек, Конституцияда Президент Администрациясининг ҳуқуқий мақоми, асосий вазифалари, фаолиятини ташкил этиш тартиби ва ваколатлари алоҳида қонун билан белгиланиши мустаҳкамлаб қўйилган.
