Хитойда "дунёдаги энг хунук ит" деб таърифланаётган Сюахуа (Huahua) лақабли ит қисқа вақт ичида ижтимоий тармоқлар юлдузига айланди. Бу ҳақда Хитой оммавий ахборот воситалари хабар берди.
Маълум қилинишича, бор-йўғи бир ҳафта ичида Сюахуа иштирок этган қисқа видеолар турли платформаларда миллионлаб марта томоша қилинган. Фойдаланувчилар унинг ғайриоддий ташқи кўринишини «хунук, аммо жозибали» дея баҳолаб, ҳазил тариқасида «гўзаллик танловида охиридан биринчи ўринни эгаллаган ит» деб аташмоқда.
Маҳаллий ОАВ маълумотига кўра, Сюахуанинг ота-онаси кўргазмаларда қатнашадиган зотдор бордер-колли итлари ҳисобланади. Бир туғилган бошқа кучукчалар эса зот стандартига тўлиқ мос ташқи кўринишга эга бўлган. Бироқ Сюахуа кам учрайдиган генетик мутация оқибатида бутунлай бошқача қиёфада туғилган. Унинг жунлари тартибсиз ўсган бўлиб, қулоқларининг икки томонида патга ўхшаш жун тутамлари ажралиб туради.
Айнан шу ғайриоддий ташқи кўриниши сабабли итни узоқ вақт сотишнинг иложи бўлмаган. Аммо унинг видеоси тасодифан интернетга жойланганидан сўнг Сюахуа қисқа вақт ичида машҳурликка эришган. Натижада 3 август куни у янги эгасига 2400 юань, яъни тахминан 4,3 миллион сўмга сотилган.
