АҚШ Президенти Дональд Трампнинг Калифорния штатдаги голф клуби яқинида қуролланган шахс қўлга олинди. Бу ҳақда BBC хабар берди.
Маълум қилинишича, ҳодиса 2 август куни Дональд Трампнинг мазкур ҳудудга ташрифи арафасида содир бўлган. Хавфсизликни таъминлаётган Махфий хизмат агентлари шубҳали ҳаракат қилаётган эркакни кузатувга олган.
Полиция маълумотига кўра, гумонланувчи голф клуби атрофида айланиб юрган, ҳудудни фото ва видеотасвирга олган ҳамда хавфсизлик хизмати ходимларининг ҳаракатларини кузатган.
Қўлга олинган шахс 38 ёшли Жанин Жон Теле экани аниқланган. Унинг аввалдан босқинчилик билан боғлиқ жиноят бўйича тергов остида бўлгани маълум қилинган.
Тинтув вақтида гумонланувчининг ёнидан ўқ-дорилар, автомобилидан эса ўқланган тўппонча топилган. Шунингдек, унинг яшаш манзилидан бир нечта қурол-яроғ, зирҳли нимча ҳамда ҳуқуқ-тартибот идоралари томонидан «хавотирли» деб баҳоланган ёзувлар мавжуд дафтарлар мусодара қилинган.
Сўнгги йилларда Дональд Трампга нисбатан бир неча бор суиқасд уюштиришга уринишлар қайд этилган.
Жумладан, жорий йил апрель ойида Вашингтон шаҳридаги Washington Hilton меҳмонхонасида Трамп ва унинг маъмурияти вакиллари иштирокидаги тадбир вақтида отишма содир бўлган. Кейинчалик гумонланувчи давлат амалдорларига суиқасд уюштиришни режалаштирганини тан олган.
Июнь ойида эса Федерал қидирув бюроси Оқ уйда ўтказилиши режалаштирилган UFC турнири чоғида амалга оширилиши мумкин бўлган яна бир суиқасднинг олди олинганини маълум қилган.
Эслатиб ўтамиз, 2024 йил 13 июль куни Пенсилвания штатидаги сайловолди митингида Дональд Трамп қулоғидан яраланган эди. Ҳужум оқибатида митинг иштирокчиларидан бири ҳалок бўлган, яна икки киши жароҳатланган. Ҳужумчи — 20 ёшли Томас Мэттью Крукс Махфий хизмат ходимлари томонидан воқеа жойида отиб ўлдирилган.
Орадан икки ой ўтиб, 2024 йил 15 сентябрь куни Флоридадаги Трампга тегишли голф клуби яқинида яна бир суиқасдга уриниш содир бўлган. Махфий хизмат ходимлари буталар орасида яширинган Райан Уэсли Раутни пайқаб, унга қарата ўт очган. 58 ёшли гумонланувчи воқеа жойидан автомобилда қочишга уринганида қўлга олинган. Ҳодиса жойидан нишонга олиш мосламаси ўрнатилган АК-47 автомати, иккита рюкзак ва GoPro видеокамераси топилган. Кейинчалик унга суиқасдга тайёргарлик кўриш айби қўйилган.
