Мексиканинг Герреро штати собиқ губернатори Анхел Агирре 2014 йилда бедарак йўқолган 43 нафар талабага оид иш бўйича далилларни йўқ қилишни буюрганликда гумон қилиниб қўлга олинди. Бу ҳақда мамлакат Бош прокурори Эрнестина Годой маълум қилди.
Прокуратура маълумотига кўра, собиқ губернатор одил судловга тўсқинлик қилиш ҳамда мажбурий йўқолиш жиноятларида гумон қилинмоқда. Агирре эса аввалроқ ўзига нисбатан билдирилган айбловларни рад этган.
Тергов маълумотларига кўра, Айотсинапа қишлоқ ўқитувчилар коллежининг 43 нафар талабаси 2014 йилда Мехикодаги намойишга йўл олган вақтда уюшган жиноий гуруҳ аъзолари ва полиция ходимлари иштирокида ўғирлаб кетилган ва ўлдирилган. Ҳозиргача улардан атиги уч нафарининг жасади расман аниқланган, қолганларининг тақдири эса ҳамон номаълум.
Бош прокурорнинг айтишича, янги гувоҳлар кўрсатмалари Агирре талабаларнинг йўқолишига оид муҳим далилларни йўқ қилиш бўйича юқори лавозимли амалдорлар билан йиғилиш ўтказган бўлиши мумкинлигини кўрсатган.
Мустақил халқаро экспертлар ҳам янги далиллар давлат вакилларининг ушбу жиноятдаги эҳтимолий иштироки ҳақидаги аввалги хулосаларни янада мустаҳкамлашини таъкидламоқда. Уларга кўра, агар видеокузатув тасвирлари ўз вақтида сақланганида, талабалар тақдирини аниқлаш имконияти юқорироқ бўлиши мумкин эди.
Қайд этилишича, мазкур воқеа Мексика тарихида инсон ҳуқуқлари билан боғлиқ энг оғир ва баҳсли ишларнинг бири ҳисобланади.
