Куба ёқилғи танқислиги ва тез-тез электр узилишлари фонида қуёш энергетикасини ривожлантирмоқда. Мамлакатда сўнгги икки йилда камида 59 та қуёш электр станцияси қурилган. Бу ҳақда хорижий манбаларга таяниб Zamon.uz хабар берди.
The Wall Street Journal маълумотларига кўра, уларнинг 41 таси ўрта, 18 таси кичик қувватли станциялардир. Ҳукумат 2028 йилгача ўрта ҳажмдаги станциялар сонини 92 тага етказишни режалаштирмоқда.
Янги станцияларнинг умумий қуввати қарийб 1000 мегаваттни ташкил этиши мумкин. Бу мамлакатдаги одатий электр энергияси талабининг учдан бир қисмига тенг.
Қуёш энергетикасидаги асосий ускуналар Хитойдан келтирилмоқда. Хитойнинг Кубага қуёш панеллари экспорти 2023 йилдаги 3 миллион доллардан 2025 йилда 117 миллион долларга ошган.
Шу билан бирга, Кубада электр таъминоти муаммолари сақланиб қолмоқда. 2026 йил бошидан бери мамлакатда камида олти марта йирик блэкаут кузатилган. 2 ва 4 август кунлари эса электр таъминотидаги узилишлар бутун мамлакатни қамраб олган.
