Жиззах вилоятининг Фориш туманида профилактика инспектори аёлга куч ишлатгани акс этган видео ижтимоий тармоқларда тарқалди. Ҳолат юзасидан терговга қадар текширув ҳаракатлари олиб борилмоқда. Бу ҳақда Жиззах вилояти ИИБ матбуот хизмати хабар берди.
Маълум қилинишича, воқеа 5 август куни соат 21:30 атрофида Фориш туманидаги "Оқтепа" МФЙда жойлашган ресторанда содир бўлган. ИИБга ресторан ходимларидан бир гуруҳ маст шахслар буюртма қилинган таомлар учун ҳақ тўламай, жанжал қилаётгани ҳақида хабар келиб тушган.
Воқеа жойига профилактика инспекторлари ва Қўриқлаш бўлими ходимлари етиб бориб, жамоат тартибини сақлаш чораларини кўрган.
ИИБ маълумотига кўра, тартиббузарлардан бири — муқаддам судланган аёл — ходимларнинг қонуний талабларига бўйсунмасдан, жанжални давом эттирган. Шундан сўнг у белгиланган тартибда тиббий кўрикдан ўтказилиб, маст ҳолатда бўлган шахсларни вақтинча сақлаш ва реабилитация қилиш пункти — "ҳушёрхона"га жойлаштирилган.
Тиббий кўрик давомида аёлнинг танасида ҳеч қандай жароҳат аниқланмаган.
Кейинчалик ушбу аёлнинг қизи "ҳушёрхона"га келиб, жамоат тартибини бузган ҳолда ходимларни турли ҳақоратли сўзлар билан ҳақорат қилган ва уларга тан жароҳати етказишга уринган.
Жиззах вилояти ИИБ маълумотида айтилишича, юзага келган вазият қонунчиликда белгиланган тартибда бартараф этилган. Фуқароларга нисбатан қўл кишани, резина таёқ ёки электрошокер каби махсус воситалар қўлланилмаган.
Ҳозирда воқеада иштирок этган барча шахсларнинг хатти-ҳаракатларига ҳуқуқий баҳо бериш мақсадида терговга қадар текширув ҳаракатлари олиб борилмоқда.
Қонун нима дейди?
"Ички ишлар органлари тўғрисида"ги қонуннинг 22-моддасига кўра, агар куч ишлатилмайдиган усуллар ички ишлар органи ходими зиммасига юклатилган вазифаларни бажаришни таъминламаса, ходим айрим ҳолатларда жисмоний куч ишлатиш ҳуқуқига эга.
Жумладан, жиноят ёки маъмурий ҳуқуқбузарликка чек қўйиш, ҳуқуқбузарлик содир этган шахсларни ички ишлар органи ёки ҳуқуқни муҳофаза қилувчи бошқа органга олиб бориш ва ушлаб туриш, шунингдек, ходимнинг қонуний талабларига қаршилик кўрсатилишини бартараф этиш учун жисмоний куч ишлатилиши мумкин.
Шу билан бирга, ҳомиладорлик белгилари сезилиб турган аёлларга, ногиронлик белгилари кўриниб турган шахсларга, ёши аниқ кўриниб турган ёки маълум бўлган вояга етмаганларга нисбатан жисмоний куч ишлатиш тақиқланади.
