“Дельфин” тайфунининг қолдиқлари Хитой пойтахти Пекинда кучли ёғингарчиликларни келтириб чиқариб, оммавий эвакуация ишлари бошланишига сабаб бўлди. Синоптиклар яқин 24 соат ичида шаҳарга 150 миллиметрдан ортиқ ёғингарчилик ёғиши мумкинлигидан огоҳлантирмоқда. Айрим ҳудудларда бу кўрсаткич 200 миллиметрдан ошиши кутилмоқда. Бу Пекиндаги йиллик ўртача ёғингарчилик миқдорининг учдан бир қисмидан кўпроғига тенг.
Маълум қилинишича, сув тошқини ва кўчки хавфи юқори бўлган ҳудудларда истиқомат қилувчи минглаб киши хавфсиз жойларга кўчирилган.
12 август куни Пекинда кучли ёғингарчилик бўйича огоҳлантиришнинг иккинчи даражаси — тўқ сариқ сигнал эълон қилинган.
Шаҳар ҳокимияти юзлаб сайёҳлик объектлари ва кемпингларни вақтинча ёпган. 1300 дан ортиқ сайёҳ эвакуация қилинган ёки уларнинг хавфли ҳудудларга кириши чекланган.
Шунингдек, қариялар уйларида истиқомат қилувчи қарийб 5000 нафар кекса хавфсиз жойларга кўчирилган. Тоғли ва сув бўйидаги ҳудудларда, шунингдек, қурилиш майдонлари яқинида яшовчи қарийб 1800 киши ҳам эвакуация қилинган.
“Дельфин” тайфуни дастлаб Хитойнинг Чжэцзян провинцияси ҳудудига етиб келган ва кучли ёғингарчиликларни келтириб чиқарган. Тайфун кучсизланиб, тропик депрессияга айланган бўлса-да, унинг қолдиқ намлиги Хитойнинг шимолий ва марказий ҳудудларида кучли ёмғирларга сабаб бўлмоқда.
Пекинда вазият туфайли транспорт ҳаракати ҳам чекланган. Айрим автобус йўналишлари тўхтатилган, темирйўл қатновларида эса кечикишлар кузатилмоқда.
Хитойнинг Хэнань провинциясида ҳам кучли ёғингарчилик хавфи туфайли энг юқори — қизил даражадаги огоҳлантириш эълон қилинган. Айрим ҳудудларда 350 миллиметргача ёғингарчилик ёғиши кутилмоқда.
