Қашқадарё вилоятининг Чироқчи туманида ЙПХ ходимларининг тўхташ ҳақидаги қонуний талабига бўйсунмаган ҳайдовчи патруль машинасини уриб, воқеа жойидан қочишга уринган. У тезкор тадбирлар натижасида ушланган.
Маълум қилинишича, тунги хизматга жалб қилинган ЙПХ инспекторлари ҳужжатларни текшириш мақсадида "Nexia-2" русумли автомобилни тўхтатган. Бироқ ҳайдовчи инспекторнинг қонуний тўхташ ишорасига бўйсунмасдан, воқеа жойидан ҳаракатланиб кетган.
Кейинги чорраҳада хизмат олиб бораётган бошқа ЙПХ ходими ҳам ҳайдовчига бир неча бор тўхташ ишорасини берган. Аммо у ички ишлар органлари ходимларининг қонуний талабини бажармасдан, ҳаракатини давом эттирган.
Шундан сўнг патруль экипажи ҳайдовчининг ҳаракатини қарама-қарши йўналишда келаётган "Nexia-2" русумли хизмат автомобили ёрдамида чеклаган. Бироқ ҳайдовчи патруль машинасига урилиб, яна воқеа жойидан қочишга уринган.
Кўрилган тезкор чора-тадбирлар натижасида ҳайдовчининг шахси аниқланиб, у қўлга олинган.
Ҳайдовчи ўз қилмишига изоҳ бериб, ҳужжатлари йўқлиги сабабли ЙПХ ходимларидан қўрққанини айтган.
"Ҳужжатим йўқлиги сабабли "ГАИ" ходимларидан қўрқиб, қарама-қарши ҳаракатландим. Қилган ишимдан афсусдаман. Бошқа такрорланмайди", — деган у.
