Ижтимоий тармоқларда бошланғич синфларда жисмоний тарбия фанидан дарс бериш тартибига оид турли хабарлар тарқалди. Мактабгача ва мактаб таълими вазирлиги мазкур хабарлар юзасидан расмий муносабат билдирди.
Маълум қилинишича, Мактабгача ва мактаб таълими, Иқтисодиёт ва молия ҳамда Соғлиқни сақлаш вазирликларининг тегишли қўшма қарори билан "Умумтаълим муассасаларида синфларни комплектлаш ҳамда тарификация рўйхатларини шакллантириш тартиби тўғрисида"ги низомга ўзгартиришлар киритилган.
Низомнинг 15-бандига кўра, бошланғич синфларда ўқитиладиган фанлар бўйича дарс соатларини тақсимлашда ўқитувчининг бошланғич таълим мутахассислигига эгалиги ёки тегишли фанни бошланғич синфларда ўқитиш методикаси бўйича таълим олгани инобатга олинади.
Вазирликка кўра, ушбу талаб бошланғич синф ўқувчиларининг ёш ва психологик хусусиятларини ҳисобга олган ҳолда таълим ва тарбия сифатини ошириш, шунингдек, дарс соатларини тақсимлашдаги келишмовчиликларни бартараф этиш мақсадида жорий этилган.
Қайд этилишича, 7–10 ёшли болаларнинг тушунчаларни идрок этиши ва фанларни ўзлаштириш жараёни юқори синф ўқувчилариникидан фарқ қилади. Шу боис бошланғич синфларда, жумладан, жисмоний тарбия фанини ўқитиш ҳам алоҳида методик ёндашувни талаб этади.
Янги тартибга кўра, бошланғич синфларда дарс берувчи ўқитувчининг ушбу синфларда ўқитиш методикаси бўйича тегишли таълим олган бўлиши талаб этилади.
Шу билан бирга, бошланғич синфларда жисмоний тарбия фанини ўқитиш методикаси бўйича таълим олган жисмоний тарбия фани ўқитувчилари ҳам ушбу синфларда дарс бериш ҳуқуқига эга.
