Аpple компанияси 110 та давлатдаги айрим фойдаланувчиларига мураккаб жосуслик дастурлари ҳужуми нишонга олинган бўлиши мумкинлиги ҳақида хавфсизлик огоҳлантиришларини юборди. Компаниянинг билдиришича, хавф iPhone, iPad ва Mac қурилмаларига тааллуқли бўлиши мумкин. Бу ҳақда TASS хабар берди.
Огоҳлантиришлар 13 август куни юборилган. Apple жосуслик дастурлари билан боғлиқ таҳдидлар ҳақида огоҳлантиришларни бошлаганидан буён 150 дан ортиқ давлатдаги фойдаланувчиларини хабардор қилган.
Компания маълумотларига кўра, бундай дастурлар оддий зарарли дастурлардан фарқ қилади ва асосан аниқ шахсларни нишонга олиш учун қўлланади. Улардан ҳукуматлар, шунингдек, журналистлар, фаоллар ва фуқаролик жамияти вакилларини кузатишда фойдаланилган ҳолатлар ҳам қайд этилган.
Apple энди хавфсизлик огоҳлантиришларини тўғридан-тўғри iPhone’нинг қулф экранида кўрсатмоқда. Шунингдек, хабарлар электрон почта орқали юборилади ва фойдаланувчи Apple аккаунтига кирганида ҳам акс этади.
Компания огоҳлантириш олиш қурилма аллақачон бузиб кирилганини англатмаслигини таъкидлади. Бу Apple махсус нишонга олиш эҳтимоли борлигини кўрсатувчи шубҳали фаолликни аниқлаганини англатади.
Apple хавф ҳақида хабар олган фойдаланувчиларга Lockdown Mode — "Чеклов режими"ни ёқишни тавсия қилди. Мазкур режим юқори даражада нишонга олинган киберҳужумлардан ҳимояни кучайтиришга мўлжалланган.
