Колумбиянинг Кундинамарка департаментидаги Кукунуба ҳудудида конда портлаш содир бўлиб, олти кончи ҳалок бўлди. Бу ҳақда хорижий манбаларга таяниб Zamon.uz хабар берди.
Ҳодиса Ла Рамада ҳудудидаги "Эл Порвенир 1" конида юз берган. Портлаш вақтида конда етти киши бўлган, улардан бири ўз кучи билан ташқарига чиққан.
Қутқарувчилар олти кончининг жасадини топган.
Маълум бўлишича, ҳодисадан аввал конда текширув ўтказилиб, хавфсизлик талаблари бузилгани аниқланган. Шу сабабли камчиликлар бартараф этилгунга қадар кон фаолиятини тўхтатиш ҳақида кўрсатма берилган.
Бироқ шунга қарамай, конда ишлар давом эттирилган бўлиши мумкин. Ҳозир мутахассислар портлаш сабаблари ва тақиққа қарамай иш қандай давом этганини аниқламоқда.
