Бельгиянинг Дендермонде шаҳри яқинида канализация қувури ётқизаётган қурилишчилар эски бинонинг ертўласидан қарийб 9 млн евролик олтин хазина топди. Бу ҳақда Bild хабар берди.
Хазина собиқ пиво заводига тегишли бинода таъмирлаш ва канализация ишлари вақтида аниқланган. Олтинлар ертўладаги девор орасига яширилган бўлган.
Топилмани биринчи бўлиб қурилишда ишлаётган 18 ёшли талаба Кобе пайқаган. У дастлаб кўринган ялтироқ тангаларни оддий пул деб ўйлаган. Қазиш ишлари давомида эса девор орасидан олтин тангалар ва қуймалар чиққан.
Дастлабки ҳисоб-китобларга кўра, хазинада 49 та олтин қуйма ва минглаб тангалар бор. Уларнинг умумий қиймати тахминан 9 млн евро ёки 10 млн доллардан ортиқ деб баҳоланмоқда.
Айрим қуймаларда 1957–1961 йилларга оид белгилар аниқланган. Бино аввал маҳаллий пиво ишлаб чиқарувчи Van Assche оиласига тегишли бўлгани сабабли, хазина уларга алоқадор бўлиши мумкинлиги тахмин қилинмоқда.
Ҳозирча олтиннинг қонуний эгаси аниқланмаган. Топилмалар полицияга топширилган, прокуратура эса уларнинг келиб чиқиши ва жиноятга алоқадорлигини текширмоқда.
Хабар тарқалганидан сўнг ҳудудга хазина излаб одамлар кела бошлаган. Полиция қурилиш майдонига кирмасликка чақирди.
