Президент Шавкат Мирзиёев Хоразмда тадбиркорлар билан очиқ мулоқот ўтказмоқда. Унда илк бор туманларда ташкил этилган студиялар орқали 25 мингга яқин тадбиркор ҳам иштирок этмоқда.
Давлат раҳбари тадбирда мамлакат иқтисодий қудратини мустаҳкамлашга фаол ҳисса қўшаётган 1 миллион 200 минг нафарлик бизнес ҳамжамиятини Тадбиркорлар куни билан табриклади.
Президентнинг таъкидлашича, тадбиркорлар билан очиқ мулоқот ўтказиш анъанаси бошланганидан буён бизнесга тўсиқ бўлаётган минглаб масалаларга ечим топилган. Бу даврда 84 та қонун, 861 та фармон ва қарор қабул қилинган.
"Нима учун? Тадбиркорларимизга шароит яратиб, янги иш ўринларини кўпайтириш, одамларимизни узоққа бормасдан, маҳалласининг ўзида даромадли қилиш учун!" — деди Шавкат Мирзиёев.
Қайд этилишича, ўтган беш йилда бизнес учун ажратилган кредит портфели қарийб уч карра ошиб, 450 триллион сўмга етган. Тадбиркорлар 650 триллион сўмлик солиқ ва божхона имтиёзларидан фойдаланган.
Шунингдек, кўплаб тадбиркорлар хорижий банклардан ўз лойиҳалари учун мустақил равишда 1 миллиард доллар жалб қилган. Президент буни тадбиркорлар эришган яна бир улкан марра сифатида баҳолади.
"Бугун тадбиркорларимиз "бизнесни бошлаш" босқичидан "капитални кўпайтириш" босқичига ўтмоқда", — деди давлат раҳбари.
Сўнгги беш йилда корхоналарнинг асосий капиталга инвестициялари уч карра кўпайиб, 363 триллион сўмга етган.
Саноат ишлаб чиқариши 100 миллион доллардан ошган туманлар сони 66 тадан 116 тага кўпайган.
Ахборот технологиялари, финтех ва бошқа хизмат кўрсатиш соҳаларининг жадал ривожланиши натижасида хизматлар ҳажми 1 триллион сўмдан ошган туманлар сони 41 тадан 152 тага етган.
Халқаро маркетплейслар билан ишлаётган корхоналар сони 3,5 мингтага етган. Ўз бизнесини маҳаллада бошлаб, мамлакат бўйлаб ўнлаб филиалларга эга бўлган тадбиркорлар сони 550 тадан, миллий брендини яратган тадбиркорлар эса 300 тадан ошган.
Президент сўнгги йилларда мис, олтин, металл прокати, полиэтилен, ПВХ, каолин ва бошқа хомашё турларининг таклифи оширилганини қайд этди.
Бу эса электротехника, қурилиш материаллари, фармацевтика, тўқимачилик ва мебельсозлик каби соҳаларда катта ўсишга замин яратган.
Шунингдек, электромобиллар, полимер ва маиший кимё, "яшил" энергетика ҳамда заргарлик саноати каби янги йўналишлар шаклланган.
"BYD", "ADM Jizzakh", "Sirdaryo Asaka Motors" каби замонавий автомобиль заводлари соҳага янги технология ва компетенцияларни олиб кирган.
Президент Шавкат Мирзиёев сўнгги йилларда Хоразм вилоятида ҳам тадбиркорлик учун янги имкониятлар яратилганини таъкидлади.
Қайд этилишича, қисқа даврда вилоят иқтисодиётига 4 миллиард доллар хорижий инвестиция киритилиб, 10 мингта янги ишлаб чиқариш қуввати ишга туширилган.
"Ҳазорасп" махсус иқтисодий зонаси ва 31 та саноат зонаси ташкил этилган.
Тупроққалъа ва Янгиариқ туманларида умумий қуввати 275 мегаватт бўлган электр станциялари барпо этилган. Улар корхоналарнинг барқарор энергия таъминотини таъминлашга хизмат қилмоқда.
Бугун Хоразм иқтисодиётининг 72 фоизини кичик бизнес яратмоқда. Вилоят экспортида кичик бизнес улуши 81 фоизга етган ва Хоразм бу кўрсаткич бўйича республикада биринчи ўринга чиққан.
Вилоятда ҳафталик авиақатновлар сони 16 тадан 102 тага, темир йўл қатновлари эса 8 тадан 41 тага кўпайган.
"Тошкент — Хива" тезюрар поезди қатнови йўлга қўйилган. Шунингдек, 35 километрлик янги "Урганч — Хива" автомобиль йўли ишга туширилмоқда.
Туризм соҳасида ҳам янги лойиҳалар амалга оширилмоқда. Хивада 25 гектар майдонда "Арда Хива" туризм мажмуаси барпо этилган. Тадбиркорлар томонидан 7 минг ўринга мўлжалланган 331 та меҳмонхона ва меҳмон уйи ташкил этилган.
Жорий йилда Хоразмга 3 миллион нафар хорижий сайёҳ келиши кутилмоқда.
Шунингдек, Хивада меҳмонхона, савдо ва кўнгилочар объектларни ўз ичига олган "Саҳро юлдузи" туризм мажмуаси барпо этилади.
"Бир сўз билан айтганда, бугун Хоразм тадбиркорлар учун янги имкониятлар марказига айланиб бормоқда", — деди Президент.
Мулоқот давомида тадбиркорларни қўллаб-қувватлаш, ҳудудларда бизнес имкониятларини янада кенгайтириш ва янги инвестицияларни жалб қилишга қаратилган ташаббуслар тақдим этилиши кутилмоқда.
