Президент Шавкат Мирзиёев тадбиркорлар билан очиқ мулоқотда бизнесни қўллаб-қувватлашга қаратилган янги ташаббусларни эълон қилди. Унга кўра, тадбиркорлик фаолиятини энди бошлаётганларга 200 миллион сўмгача гаровсиз кредит ажратилади.
Давлат раҳбари тадбиркорлик учун барқарор ўсиш траекториясини таъминлаш биринчи йўналиш сифатида белгиланганини айтди.
Қайд этилишича, банклар кредит портфелида кичик бизнеснинг улуши 45 фоиздан 63 фоизга ошган. Жорий йилнинг биринчи ярмида кичик ва ўрта бизнесга 76,5 триллион сўм ресурс ажратилган.
Шунингдек, яқинда "Кредит хизматлари ягона рақамли портали" ишга туширилган. Энди тадбиркор битта ариза топширади, банклар эса мижоз учун ўзаро рақобат қилади. Бизнесини энди бошлаётганлар 5 миллиард сўмгача кредитни онлайн расмийлаштириши мумкин бўлади.
Президент тадбиркорликнинг ҳар бир босқичига мос ягона экотизим яратилишини маълум қилди.
Унга кўра, янги тадбиркорлар учун "Бизнес старт", ишлаб чиқаришни йўлга қўйганлар учун "Бизнес лифт", янги ўсиш босқичига ўтаётганлар учун эса "Бизнес юксалиш" дастурлари жорий этилади.
"Бизнес старт" дастури доирасида тадбиркорларга сунъий интеллект ёрдамида лойиҳа тайёрлаш, кредит ҳужжатларини расмийлаштириш ва ҳисобот юритиш ўргатилади.
Бу мақсадларга 100 миллиард сўм ажратилади. Тадбиркорларга тайёр бизнес-режа билан бирга 200 миллион сўмгача гаровсиз кредит бериш имконияти яратилади.
"Тадбиркорга кредит бериш эмас, уни биринчи қадамидан катта бизнесга айлангунча бошидан охиригача қўллаб-қувватлайдиган комплекс тизим яратамиз", — деди Шавкат Мирзиёев.
