25 ёшли йигит тушдан кейин қўйларини боқиш учун уйдан чиққан ва кучли сел оқими оқибатида ҳалок бўлган.
Қашқадарё вилоятида сел оқими бир инсоннинг умрига зомин бўлди. Бу ҳақда Kun.uz’га Бош прокурор матбуот котиби Ҳаёт Шамсутдинов маълум қилди.
Маълум қилинишича, 19 май куни соат 20:20 ларда Деҳқонобод тумани ИИБ навбатчилик қисмига Янги ҳаёт маҳалласи Қурилиш қишлоғи ҳудудидаги дарёдан сел билан бирга номаълум эркакнинг жасади оқиб келгани ҳақида хабар келиб тушган. Шундан сўнг туман прокурори раҳбарлигидаги тергов-тезкор гуруҳи воқеа жойига чиққан.
Терговга қадар текширув жараёнида ҳалок бўлган шахс 2001 йилда туғилган О.Ш. экани аниқланган.
Марҳумнинг яқинлари билдиришича, у 19 май куни соат 15:00 атрофида қўйларини боқиш мақсадида уйдан чиққан. Соат 18:00 га қадар қайтиб келмаган вақтда қишлоқ ҳудудида кучли ёмғир ёғиб, сел келган. Орадан маълум вақт ўтиб, йигитнинг жасади сув оқимида топилган.
Ҳозирда ҳолат юзасидан Деҳқонобод туман прокуратураси томонидан терговга қадар текширув ҳаракатлари олиб борилмоқда.
Фавқулодда вазиятлар вазирлиги ахборот хизмати маълумотига кўра, 19 май куни Қашқадарё вилоятининг Қамаши, Яккабоғ, Деҳқонобод ва Шаҳрисабз туманларида кучли ёғингарчилик кузатилган. Сел тошиши оқибатида Қамаши туманида ички йўл, Яккабоғ туманида эса кўприк вақтинча ёпилган.
