Бразилия терма жамоаси ва “Сантос” клуби ҳужумчиси Неймар 2026 йилги Жаҳон чемпионатига тайёргарлик жараёни арафасида яна жароҳат олди. Футболчининг ўнг болдир мушакларида шиш пайдо бўлгани айтилмоқда.
“Globo” нашрининг хабар беришича, жароҳат жиддий эмас. Шунга қарамай, 34 ёшли футболчи маълум муддат даволаниши ва жисмоний юкламаларни чеклаши керак бўлади.
Ҳозирда Неймар “Сантос”нинг машғулот марказида шахсий тиббий гуруҳи назорати остида тикланмоқда. Шунингдек, Бразилия футбол конфедерацияси мутахассислари ҳам унинг ҳолатини кузатиб бормоқда.
Манбага кўра, ҳужумчи 27 майга қадар тўлиқ машғулотларга қайтиши ва Жаҳон чемпионати олдидан миллий терма жамоа йиғинига қўшилиши кутилмоқда.
Аввалроқ Бразилия терма жамоаси бош мураббийи Карло Анчелотти Неймарни уч йиллик танаффусдан сўнг яна терма жамоа таркибига жалб қилганди.
