Рақобат қўмитаси айрим дорихоналарда дори воситалари нархи асоссиз равишда кескин оширилганини аниқлади. Қўмита маълумотига кўра, қарийб 2,5 мингта дорихона томонидан 686 мингга яқин ҳолатда белгиланган савдо устамалари 10 фоиздан 3 бараваргача оширилган. Натижада истеъмолчилардан 21,1 млрд сўм асоссиз ундирилган.
Қайд этилишича, қоидабузарликлар юзасидан тегишли чоралар кўрилиб, ноқонуний олинган маблағларни фуқароларга қайтариш ишлари бошланган.
Шунингдек, жорий йилнинг биринчи чорагида 190 дан ортиқ дорихонада 110,5 мингта ҳолат аниқланган. Уларда ҳам дори воситалари нархи сунъий оширилиб, аҳолидан 1,4 млрд сўмдан ортиқ маблағ ортиқча ундирилгани маълум бўлди.
Қўмита фуқароларга дори харид қилишда референт нархлар реестри орқали нархларни текширишни тавсия қилди. Агар дори воситалари белгиланганидан қиммат сотилаётгани аниқланса, 1159 қисқа рақами орқали мурожаат қилиш мумкин.
Эслатиб ўтамиз, ўтган йилда ҳам дорихоналар томонидан дори нархларини асоссиз ошириш ҳолатлари кузатилган эди. Ўшанда 765 та дорихонада 267 мингдан ортиқ қоидабузарлик аниқланиб, қарийб 8 млрд сўм ноқонуний даромад олингани маълум қилинган.
