Тадбирда мамлакатда давлат бошқаруви тизимини модернизация қилиш, давлат хизматлари сифатини ошириш, фуқаролар манфаатларига хизмат қилувчи самарали бошқарув механизмларини жорий этиш борасида амалга оширилаётган ислоҳотлар ҳақида сўз юритилди.
Қайд этилишича, кейинги йилларда Ўзбекистонда давлат хизмати тизимида профессионаллик, очиқлик ва жамоатчилик олдидаги масъулиятни кучайтиришга қаратилган янги ёндашувлар жорий қилинмоқда. Хусусан, 2022 йилда “Давлат хизмати тўғрисида”ги қонун қабул қилиниши соҳадаги муҳим қадам сифатида эътироф этилди.
Тадбирда Ўзбекистон ва Бирлашган Араб Амирликлари ўртасида давлат бошқаруви соҳасида тажриба алмашиш йўлга қўйилгани, жорий йил март–апрель ойларида хорижий ва маҳаллий экспертлар 41 та вазирлик, қўмита ва агентлик фаолиятини таҳлил қилгани маълум қилинди. Мукофот соҳиблари ушбу баҳолаш натижалари асосида аниқланган.
Маросимда Ўзбекистон Республикаси Олий Мажлиси Қонунчилик палатаси Спикери Нуриддин Исмоилов ҳамда Президентнинг кадрлар сиёсати бўйича маслаҳатчиси Ғофуржон Мирзаев иштирок этди.
Тақдирлаш якунларига кўра, “Энг яхши вазирлик” номинацияси ғолиби Адлия вазирлиги деб топилди. Шунингдек, вазирлик “Ўзбекистон – 2030” стратегиясини самарали амалга ошириш, инновациялар, самарали бошқарув ва интеграциялашган қўллаб-қувватлаш механизмлари йўналишларида ҳам ғолиб бўлди.
Тоғ-кон саноати ва геология вазирлиги ресурсларни бошқариш, инсон капиталини ривожлантириш ҳамда интеграциялашган қўллаб-қувватлаш механизмлари бўйича энг яхши давлат органи сифатида эътироф этилди.
