Андижон вилоятида ер майдонларини ноқонуний тарзда расмийлаштириб беришни ваъда қилган бир нечта мансабдор шахслар қўлга олинди.
Маълум бўлишича, Фарғона водийси магистрал каналлардан фойдаланиш бошқармаси 2-Шаҳрихон бўлими 3-гидроучасткаси бошлиғи чорвачилик билан шуғулланмоқчи бўлган фуқарога катта Фарғона канали ҳимоя ҳудудидаги 30 сотих ерни ижарага олиб бериш эвазига 40,5 минг доллар талаб қилган. У 20 минг доллардан 3 минг долларни олган вақтида ДХХ ва Департамент ходимлари томонидан ушланган.
Тезкор тадбирлар давомида ушбу ҳолатга бошқарманинг яна бир масъул ходими алоқадорлиги аниқланиб, у ҳам пулнинг бир қисмини олган вақтида қўлга олинган.
Шунингдек, ушбу ердан фойдаланиб келган гидроучастка ходими ҳам ерни бериш учун 19 минг доллар талаб қилгани маълум бўлган.
Яна бир ҳолат Олтинкўл туманида қайд этилди. У ерда таълим муассасаси директори автомактаб фойдасига шартномани тасдиқлаб бериш эвазига 15 минг доллар сўраган. У олдиндан 10 минг доллар олган вақтида ушланган.
Ҳар икки ҳолат юзасидан жиноят иши қўзғатилиб, тергов ҳаракатлари олиб борилмоқда.
