Сурхондарё вилояти Термиз шаҳрида юзлаб дарахтларнинг ноқонуний кесилиши билан боғлиқ жиноят иши юзасидан собиқ мансабдорга ҳукм ўқилди.
Тергов материалларига кўра, собиқ шаҳар қурилиш бўлими бошлиғи МЧЖ раҳбари билан олдиндан тил бириктириб, “Дўстлик” маҳалласи ҳудудида жойлашган дарахтларни кўчириш ва ҳудудни бўшатишни режалаштирган.
Қайд этилишича, экология идоралари томонидан дарахтларни кесиш учун рухсат берилмаган. Шунга қарамасдан, ҳудуддаги 217 туп дарахт ноқонуний равишда кесиб ташланган.
Кесилган дарахтлар орасида 61 туп Элдор қарағайи, 36 туп Виргин арчаси, 101 туп Шарқ биотаси, 16 туп чинор ҳамда 4 туп тут дарахти бўлган.
Мутахассислар хулосасига кўра, ушбу ҳолат оқибатида экологияга 2 миллиард 69 миллион сўмдан ортиқ зарар етказилган.
Суд ҳукми билан собиқ мансабдор айбдор деб топилиб, унга нисбатан 2 йил муддатга ахлоқ тузатиш ишлари жазоси тайинланган. Шунингдек, унинг қамоқда сақланган вақти ҳисобга олиниб, якуний жазо 1 йил 5 ой 15 кун этиб белгиланган.
