АҚШ Фуқаролик ва иммиграция хизмати (USCIS) янги иммиграция қоидаларини эълон қилди. Унга кўра, яшил карта (Green Card) олиш учун мурожаат қилувчилар ариза жараёнида АҚШ ҳудудидан чиқиб, ҳужжатларни хорижда топшириши талаб этилиши мумкин. Бу ҳақда Zamon.uz хабар берди
USCIS маълумотида айтилишича, ушбу чоралар ноқонуний иммиграцияни камайтириш ва доимий яшаш ҳуқуқи рад этилганидан кейин мамлакатда қолиб кетиш ҳолатларининг олдини олишга қаратилган.
Янги тартибга кўра, талабалар, вақтинчалик ишчилар ва сайёҳлар каби ноиммиграцион виза эгалари ташриф муддати тугагач АҚШни тарк этиши шартлиги таъкидланмоқда. Иммиграция ишларининг асосий қисми АҚШ консулликлари орқали кўриб чиқилиши режалаштирилган.
СNN маълумотларига кўра, бу ўзгаришлар баъзи оилаларнинг ажралиши, иш ўринларининг йўқолиши ва иммиграцион ноаниқликларнинг кучайишига сабаб бўлиши мумкин.
Шунингдек, АҚШда “олтин карта” дастури ҳам жорий этилган. Унга кўра, ариза кўриб чиқишни тезлаштириш учун 15 минг доллар тўлов ва кейинчалик 1 миллион долларлик депозит асосида яшаш ва ишлаш имконияти берилади.
