Ўзбекистон Мудофаа вазири Шуҳрат Холмухаммадов бошчилигидаги делегация 21-май куни расмий ташриф билан Қатар пойтахти Доха шаҳрига борди. Бу ҳақда Мудофаа вазирлиги ахборот хизмати хабар берди.
Ташриф доирасида вазир Қатар Бош вазири ўринбосари ва мудофаа ишлари бўйича давлат вазири Шайх Сауд бин Абдурраҳмон бин Ҳасан Ол Таний билан учрашув ўтказди.
Мулоқот давомида томонлар минтақадаги хавфсизлик билан боғлиқ сўнгги вазият ва ўзгаришларни муҳокама қилди. Шунингдек, мавжуд шароитлардан келиб чиқиб, ҳарбий ҳамкорлик ва қўшма мувофиқлаштириш масалалари кўриб чиқилди.
Учрашув якунида Ўзбекистон ва Қатар ўртасида ҳарбий ҳамкорлик бўйича ўзаро англашув меморандуми имзоланди.
Эслатиб ўтамиз, Ўзбекистон Мудофаа вазири 20-январ куни Туркия Миллий мудофаа вазири Яшар Гюлер билан 2026 йилга мўлжалланган ҳарбий ҳамкорлик режасини имзолаган эди. Ушбу режа доирасида ҳарбий бўлинмаларнинг қўшма машғулотлари, кадрлар алмашинуви ҳамда техник ҳамкорлик йўналишлари назарда тутилган.
