Арманистон ташқи ишлар вазири Арарат Мирзоян Ереван Россия Федерацияси билан мавжуд стратегик шериклик ва ҳамкорлик муносабатларини сақлаб қолиш ҳамда уни изчил ривожлантиришдан манфаатдор эканини билдирди.
Унинг таъкидлашича, Арманистоннинг ташқи сиёсатдаги қадамлари кўпвекторли бўлиб, мамлакат бир вақтнинг ўзида ҳам Россия, ҳам АҚШ ва Европа Иттифоқи билан ҳамкорликни кенгайтиришга интилмоқда.
Мирзоян бу орқали айрим россиялик сиёсатчилар томонидан билдирилаётган, Ереван Ғарбга яқинлашиб, Москва билан муносабатлар совуётгани ҳақидаги баёнотларга изоҳ берди. Унинг сўзларига кўра, Арманистоннинг АҚШ ва Европа Иттифоқи билан алоқаларини ривожлантириши Россияга қарши қаратилмаган, балки миллий манфаатлар ва амалий ҳамкорлик тамойилларига асосланган.
Шу билан бирга, Арманистон томони ҳар бир йўналишдаги ташқи алоқалар ўзаро манфаат, суверен тенглик ва прагматик ёндашув асосида олиб борилаётганини қайд этди.
Бундан аввал Россия ташқи ишлар вазири Сергей Лавров Арманистонни Россияга қарши сиёсий лагерга жалб қилишга уринишлар бўлаётганини айтган эди.
