Демократик Республика Конго терма жамоаси АҚШ томонидан Эбола вируси тарқалиши сабабли илгари сурилган 21 кунлик карантин талабига қарамай, Жаҳон чемпионатига тайёргарлик режасини ўзгартирмаслигини маълум қилди.
Reuters агентлигининг хабар беришича, миллий жамоа вакиллари машғулотлар режаси аввалгидек қолишини тасдиқлаган. Жамоа белгилаб қўйилган ўртоқлик ўйинларини ҳам ўтказади. 3 июнь куни Льежда (Бельгия) Данияга қарши ва 9 июнь куни Кадисда (Испания) Чилига қарши баҳслар бўлиб ўтади.
Режадаги ягона ўзгариш — Киншасага амалга оширилиши керак бўлган уч кунлик сафарнинг бекор қилиниши бўлди. У ерда терма жамоа учун Жаҳон чемпионати олдидан илк марта ўтказилиши режалаштирилган тантанали кузатув маросими ташкил этилиши кутилган эди. Бу қарор АҚШ огоҳлантиришидан олдин қабул қилинган.
Жамоа раҳбариятининг таъкидлашича, таркибдаги ҳеч бир футболчи Эбола авж олган даврда ДР Конго ҳудудида бўлмаган. Бош мураббий Себастьен Дезабр бошчилигидаги бутун жамоа асосан Европада, машғулот жараёнларида иштирок этмоқда. Шу билан бирга, бир нечта расмийлар яқин кунларда Бельгиядаги йиғинга тўғридан-тўғри ДР Конгодан етиб келгани маълум қилинди.
