Ушбу акция Президентнинг атмосфера ҳавоси сифатини яхшилашга қаратилган “Тоза ҳаво” умуммиллий лойиҳаси доирасидаги фармони асосида ташкил этилмоқда.
Ҳужжатга кўра, 2026 йил 1 майдан бошлаб ҳар ойнинг 10 ва 25 саналарида “Автомобилсиз кун” ҳамда “Автомобилсиз ҳафта” акциялари ўтказиб борилиши белгиланган.
Фармон билан давлат ташкилотлари ва идоралари ходимларига акция ўтказиладиган кунларда хизмат автотранспорт воситаларидан фойдаланиш қатъиян тақиқланган. Шу билан бирга, ушбу кунлар иш кунига тўғри келганда ҳайдовчиларнинг иш ҳақи сақлаб қолинади.
Шунингдек, “Автомобилсиз кун” акцияси вақтида хизмат автомобилларидан фойдаланиш давлат фуқаролик хизматчилари томонидан одоб-ахлоқ қоидаларини бузиш деб баҳоланиши белгиланган.
Белгиланган талабларга амал қилмаслик давлат органлари ва ташкилотлари раҳбарлари учун ходимларни интизомий жавобгарликка тортишга асос бўлади.
Экоқўмита давлат ташкилотлари ходимлари ва фуқароларни мазкур ташаббусни қўллаб-қувватлашга чақирган.
