Давлат раҳбари бу йил 472 минг нафар ўғил-қиз мактабни битираётганини, улар Янги Ўзбекистоннинг энг катта ишончи ва таянчи эканини таъкидлади.
Президентга кўра, жорий йил илк бор 11 минг нафардан зиёд битирувчи мактабни олтин ва кумуш медал билан тамомламоқда. Шунингдек, 171 нафар ёш дунёнинг етакчи университетларига қабул қилинган.
Мурожаатда меҳнат бозорида талаблар тез ўзгараётгани, шу боис ёшлар камида битта хорижий тил ва замонавий касбни эгаллаши зарурлиги қайд этилди.
Шавкат Мирзиёев тадбиркорлик қилиш истагидаги ёшлар учун банклар томонидан 25 триллион сўмлик имтиёзли кредитлар ажратилаётганини, стартап лойиҳалар учун эса 100 миллион доллар маблағ тайёрланганини айтди.
Президент ўз мурожаатида китобхонлик масаласига ҳам алоҳида тўхталиб, “китоб — нур, илм ва ибрат манбаи” эканини таъкидлади.
Шунингдек, у Жавоҳир Синдоров, Нодирбек Абдусатторов ва Абдуқодир Ҳусанов каби ёшларнинг ютуқларини мисол қилиб келтирди.
Мурожаат якунида давлат раҳбари битирувчиларни доимо олға интилишга чақириб, уларга бахт ва омад тилади.
