Тегишли ҳукуматлараро битим 15 май куни Остона шаҳрида бўлиб ўтган TRASECA Ҳукуматлараро комиссияси йиғилишида имзоланган. Унга кўра, бешта давлат ҳудудида ягона транзит рухсатнома бланки жорий этилади.
Янги тартибга кўра, беш давлат ҳудуди бўйлаб юк ташувчилар учун ягона бланк орқали транзит ҳаракати йўлга қўйилади. Бу ортиқча ҳужжатларни қисқартириб, чегаралардаги маъмурий тўсиқларни енгиллаштириши кутилмоқда.
Йиғилиш доирасида ТРАСЕКА ташкилоти бош котиби лавозимига Ўзбекистон транспорт вазири ўринбосари Жасурбек Чориев сайланди.
Шунингдек, Ўзбекистон томони транспорт тизимларини рақамлаштириш, “қоғозсиз транзит”ни жорий этиш ҳамда халқаро стандартларга мос норматив-ҳуқуқий базани такомиллаштириш бўйича таклифлар илгари сурди.
