Унинг айтишича, Россия ва Беларусь Беларусь ҳудудидан туриб Украинага ёки НАТОга аъзо мамлакатлардан бирига қарши янги ҳужумлар тайёрлаётган бўлиши мумкин.
"Биз Россия ва Беларусь раҳбарияти ўртасида нима муҳокама қилинаётганини яхши тушуниб турибмиз. Сўнгги пайтларда россияликлар ўз фаолиятини кучайтирди. Улар Беларусьни урушга янада чуқурроқ жалб қилишни ва айнан шу ҳудуддан Чернигов–Киев йўналишига ёки чегарадош НАТО давлатларидан бирига қарши қўшимча тажовузкор операцияларни бошлашни режалаштирмоқда", — деди Зеленский.
Президент Украина мудофаа ва хавфсизлик кучларига жавоб режасини тайёрлаш ҳамда Чернигов–Киев йўналиши ҳимоясини кучайтиришни топширганини айтди.
Зеленскийнинг таъкидлашича, Украинада Россиянинг Киев ва бошқа шаҳарларга зарба бериш режалари акс этган ҳужжатлар мавжуд. Уларда сиёсий ва ҳарбий объектлар, жумладан Банкова кўчасидаги бинолар ҳам нишон сифатида кўрсатилган.
"Москвадаги баъзилар ҳалигача украинлар ҳеч қачон ўз мустақиллигидан воз кечмаслигини тушунмайди. Қандай бўлмасин, биз ўз еримиз, суверенитетимиз ва давлатимиздан воз кечмаймиз", — дея қўшимча қилди у.
Россия ва Беларусь расмийлари Украина президентининг мазкур баёнотига ҳозирча муносабат билдирмаган.
Эслатиб ўтамиз, Беларусь президенти Александр Лукашенко 2024 йилда мамлакат урушга тайёр бўлиши кераклигини айтган эди. У глобал можароларни дипломатик йўл билан ҳал қилиш имкониятлари камайиб бораётганини таъкидлаган. 2025 йилда эса Беларусь ҳудудида Россиянинг «Орешник» ракетаси жанговар навбатчиликка қўйилгани хабар қилинган.
