Маълум қилинишича, жиноий гуруҳ тонг саҳар вақтда ҳарбий хизматчилар сергаклигининг пасайишидан фойдаланиб, заҳри қотил моддаларни мамлакат ҳудудига олиб киришни режалаштирган. Бироқ тезкор хизмат ходимлари уларнинг режасини барбод қилди.
Хусусан, Афғонистондан Сурхондарё вилоятидаги "Термиз-авто" чегара божхона пости орқали кириб келган Афғонистон фуқароси бошқарувидаги Mercedesрусумли юк автомашинаси белгиланган тартибда текширувдан ўтказилди. Автомашина тиркамасида олиб келинаётган Doosan русумли экскаватор инспекцион кўрик мажмуаси орқали сканер қилинганда, унинг кўтаргич қисми ичида конструкцияда кўрсатилмаган шубҳали буюмлар борлиги аниқланди.
Шундан сўнг экскаватор туйнуклари эндоскоп махсус техник воситаси ёрдамида кўздан кечирилди. Текширув натижасида кўтаргич қисмига яширилган ҳолда 593 кг гашиш ва 3 кг опий борлиги маълум бўлди.
Ҳозирда мазкур ҳолат юзасидан Жиноят кодексининг 246 ва 273-моддалари билан жиноят иши қўзғатилиб, гиёҳвандлик воситалари эгаларини қўлга олиш чоралари кўрилмоқда.
Фуқаролардан шу каби қонунбузилиш ҳолатларига дуч келган тақдирда ДХХнинг 1520 қисқа рақамига мурожаат қилиш сўралди. Шахс сир сақланиши кафолатланади.
