Маълум қилинишича, президент Шавкат Мирзиёевнинг 2025 йил 2 апрелдаги «Ёқилғи-энергетика соҳасида бозор механизмларини жорий этишда эҳтиёжманд аҳолини давлат томонидан қўллаб-қувватлашнинг қўшимча чора-тадбирлари тўғрисида»ги қарорига мувофиқ, эҳтиёжманд оилаларга ҳар ойда истеъмол қилинган электр энергияси ва табиий газ учун давлат компенсация тўловлари берилиб келинмоқда.
Амалдаги тартибга кўра, компенсация қуйидаги ҳажмлар учун тўланади:
— электр энергияси бўйича ойлик базавий меъёр (200 кВт·соат) ошган қисми учун қўшимча 150 кВт·соатгача;
— табиий газ бўйича қиш ойларида базавий меъёрдан ошган 250 куб метргача, бошқа ойларда эса 150 куб метргача бўлган истеъмол ҳажми учун.
Вазирлар Маҳкамасининг 2026 йил 15 майдаги 243-сон қарорига мувофиқ, 2026 йил 1 июндан янги тарифлар жорий этилиши муносабати билан эҳтиёжманд оилалар учун ажратиладиган компенсация миқдорлари ҳам оширилади. Янги тартибга кўра, давлат томонидан қўллаб-қувватлаш ҳажми кенгайтирилиб, тўловлар миқдори кўпайтирилади.
