Бир муддат аввал ИИВ томонидан Наманганда “босар-тусарини билмаган депутат” изоҳи остида ИИБ ходимлари ва депутат орасида бўлиб ўтган келишмовчилик ҳақидаги хабар ва унга илова қилинган, ҳолат акс этган видео эълон қилинган эди.
Бўлиб ўтган воқеага кўра, 2020 йил 15 апрель куни халқ депутатлари Наманган шаҳар кенгаши депутати Т.Мухамадиев ўзига тегишли автомашинасида Наманган шаҳар, Янгиқўрғон кўчасида ташкил этилган блок постига етиб келиб, ушбу постда хизмат олиб бораётган ИИБ ходимларининг қонуний талабларига бўйсунмасдан, уларга қаршилик кўрсатган.
Айни пайтда Бош прокуратура Матбуот хизматининг "darakchi.uz"га маълум қилишича, мазкур воқеа қаҳрамони бўлган, халқ депутатлари Наманган шаҳар кенгаши депутати Т.Мухамадиев жавобгарликка тортиладиган бўлибди.
Келтирилишича, бўлиб ўтган қоидабузарлик ҳолатидан сўнг, Наманган шаҳар прокуратураси томонидан 2020 йил 16 апрель куни Т.Мухамадиевни жиноий жавобгарликка тортиш ва эҳтиёт чораси сифатида қамоққа олишга розилик бериш ҳақида халқ депутатлари Наманган шаҳар кенгашига тақдимнома киритилган.
Мазкур тақдимнома шу куни кўриб чиқилиб, 21-06-сонли қарор билан Т.Мухамадиевни жиноий жавобгарликка тортишга рухсат берилиб, эҳтиёт чораси сифатида қамоққа олиш рад этилган.
Мазкур ҳолат юзасидан ҳамда Кенгашнинг розилиги асосида Наманган шаҳар прокуратураси томонидан ЖКнинг 219-моддаси билан жиноят иши қўзғатилган эди.
Бироқ, 2020 йил 19 апрель куни халқ депутатлари Наманган шаҳар кенгашининг навбатдан ташқари ўтказилган сессиясида, амалдаги қонунчиликка зид равишда 2020 йил 16 апрелда чиқарилган 21-06-сонли қарори бекор қилиниб, Т.Мухамадиевни жиноий жавобгарликка тортиш ва эҳтиёт чораси сифатида қамоққа олиш рад этилган.
Мазкур ҳолатни баратарф этиш мақсадида Наманган вилояти прокурори томонидан 2020 йил 21 апрлель куни Халқ депутатлари Наманган вилояти Кенгашига шаҳар кенгаши чиқарган қарорларни бекор қилиш ҳақида тақдимнома киритилди.
Мазкур такдимнома 2020 йил 25 апрель куни вилоят Кенгашида кўриб чиқилиб, шаҳар Кенгашининг 16.04.2020 йилдаги 21/06-сонли қарори ўзгаришсиз қолдирилди. Яъни Т.Мухамадиевни жиноий жавобгарликка тортишга рухсат берилиб, эҳтиёт чораси сифатида қамоққа олиш рад этилди. Кейинчалик чиқарилган, терговни тўхтатиш ҳақидаги 2020 йил 19 апрель кунги қарори эса бекор килинди.
Ҳозирда жиноят иши юзасидан тергов ҳаракатлари давом этмоқда.
Эслатиб ўтамиз, мазкур воқеа ортидан Олий Мажлис Қонунчилик палатасининг Дониёр Ғаниев бошчилигидаги бир гуруҳ депутатлари томонидан “босар-тусарини билмаган депутат” воқеа иштирокчиси бўлган ЙПХ инспекторининг хизмат “боди-камера”сида тасвирга олинган видео материалларни тўлиқ шаклда (монтажсиз) жамоатчиликка ошкор қилиниши сўралган эди.
Шундан сўнг, ИИВ томонидан ушбу мурожаатга расмий жавоб ҳам қайтарилди.
