Тошкентдаги кичик ҳалқа йўлининг Шайхонтоҳур туманидан ўтган, халқ орасида «Арча-кўча» номи билан танилган қисмида 5 июнь куни бир гуруҳ ёшлар ўртасида жанжал ва пичоқбозлик юз бериши оқибатида бир йигит вафот этгани ва бу жанжал нимадан келиб чиққани, пичоқбозликка алоқадор бир неча шахслар қўлга олингани ҳамда бу жанжалда иштирок этган яна бир йигитнинг аҳволи оғирлашгани ҳақида хабар берилганди. Пичоқбозлик иштирокчиларидан бири воқеа тафсилотларини айтиб берди.
Воқеа иштирокчиси — 23 ёшли Ҳусан Жиноят кодексининг 277-моддаси, шунингдек, қасддан баданга енгил жароҳат етказгани учун 109-моддаси билан безориликда айбланиб, судланган. Бош прокуратура расмий канали бу ҳақида видеолавҳа ҳавола қилди.
Видеода иштирокчилардан бири воқеа тафсилотларини гапириб берган. Ҳусаннинг сўзларига кўра, унинг дўсти Достон (гумонланувчи) шериги Бобур билан дорихона масаласида олди-бердиси борлигини айтган. Улар Чилонзор туманидаги «Спорт буюмлари» дўкони яқинидаги хўжалик моллари дўконига бориб, бита сотиб олган. Шундан кейин улар «Чилонзор» савдо мажмуасига бориб, иккита пичоқ харид қилган.
Шундан сўнг улар таксида Кўкчага, Бобурнинг уйига борган. Кейин эса улар биргаликда «Арча-кўча»даги Музаффар исмли танишларининг уйига борган. У ерда Достон ва вафот этган йигит Меҳрож жанжаллашиб қолган.
Ҳусаннинг айтишича, у икки йигитни ажратиш учун борганда Меҳрож унинг юзига урган. Ҳусан ўзини йўқотиб қўйган, Достон ва Меҳрож эса бир-бирини қувиб кетган.
Шундан кейин Ҳусан ўзини ҳимоя қилиш учун машинадаги битани қўлига олган. Жанжаллашаётган икки гуруҳ катта кўчага чиққан. Ҳусан Меҳрожнинг чап елкасига ва қўлига урган. Зарба натижасида Меҳрожнинг қўлидаги пичоқ тушиб кетган, Ҳусан пичоқни олиб, у билан бошқа бир йигитнинг қўлига зарба берган.
Унинг айтишича, жанжал давомида Меҳрож ва Достон бир-бирига пичоқ урган.
Айни пайтда мазкур жиноят иши бўйича дастлабки тергов ҳаракатлари Тошкент шаҳар прокуратурасининг Ўта оғир жиноятларни тергов қилиш бўлими томонидан олиб борилмоқда.
