Аввал хабар қилганимиздек, кеча Ўзбекистон Республикаси Президенти Шавкат Мирзиёев раислигида хизмат кўрсатиш ва ички туризм соҳаларини ривожлантириш масалалари бўйича видеоселектор йиғилиши ўтказилди.
Тадбир аввалида давлатимиз раҳбари коронавирус билан боғлиқ вазиятга тўхталиб, охирги пайтда юртимизда бу касалликка чалинганлар сони ошгани, энг ёмони, аҳоли ўртасида ҳам кўплаб рўй бераётганига эътибор қаратди.
“Биз иқтисодиётни инобатга олиб, карантинни юмшатяпмиз. Шу билан биргаликда карантин нормаларига келишганимиздек, бир карра эмас, ўн карра эътибор керак. Мен биринчи кундан карантин шароитида яшаш ва ишлашга ўрганишимиз керак деб айтганман. Лекин агар шундай давом этаверса, кўп вилоятлар ва шаҳарларни ёпишга мажбур бўламиз”, деди Шавкат Мирзиёев.
Эслатиб ўтамиз, йиғилиш давомида Шавкат Мирзиёев Тошкент шаҳрида сўнгги икки ҳафтада аҳоли орасида 482 та ҳолатда коронавирус аниқланганини ва уларнинг 57 тасида вирусни юқтириш манбаси номаълум эканини қайд этган.
Бундан ташқари, вируснинг енгил шаклига чалинган ва касаллик аломатларсиз кечаётган беморларни уйда даволаш амалиётини йўлга қўйиш кераклиги таъкидланди.
