Аввал хабар қилинганидек, Яккасарой туман тиббиёт бирлашмаси шифокори А.У.нинг шу йилнинг 14 июнь кунидан Тошкент вилояти Юқори Чирчиқ туманидаги карантин марказидаги фуқароларга тиббий хизмат кўрсатиш мақсадида фаолият кўрсата бошлаган, 23 июнь куни аҳволи оғирлашиб, 26 июнда вафот этган эди.
Шундан сўнг, марҳум шифокорнинг қизи отасининг ўлими юзасидан айрим маълумотларни келтириб, бошқаларни ҳам огоҳликка чақирди.
Бугун, 1 июль куни Ўзбекистон Республикаси Соғлиқни сақлаш вазири Алишер Шодмонов марҳумнинг уйига бориб, Қуръон тиловат қилди ва марҳумнинг оила аъзоларидан кўнгил сўради.
Шунингдек, бугуннинг ўзида вазирлик масъул ходимлари Алишер Ураловнинг оила аъзоларига Ўзбекистон Республикаси Президенти қарорида белгиланганидек, 250 миллион сўм компенсация пулини етказиб бердилар. Бу ҳақда Қалампир.уз марҳумнинг қизи Шаҳноза Ҳасановага таяниб ёзмоқда.
" Соғлиқни сақлаш вазири Алишер Шодмоновни фақат телевизор орқали кўрганман. Шу икки кун ичида ижтимоий тармоқларда тарқалган мурожаатимга бефарқ қарамасдан, муаммоимнинг ечимига киришганлари кўнглимни кўтарди. Шу сабаб бу одам мени эшита олади деган ҳис пайдо бўлди.
У киши кириб келганларидан кейин мусулмончиликка муносиб ҳолатда дуога қўл очилди. Ундан кейин секин-аста, ҳеч қандай босимларсиз, жуда яқин инсонлардек гаплашдик.
Муомалаларидан у киши ҳақиқатан ҳам вазирлик лавозимига муносиб эканликларини билдим. Овозларини кўтармасдан, дарров масалага ўтмасдан, оғирлик ва босиқлик билан бизни тингладилар. Ойим айрилиқ азобидан йиғлаб юбордилар. Мен ҳам фарзанд бўлиб, онамнинг ёнларида турибман, аммо оилада ота ўрнини босиб бўлмас экан.
Алишер ака, бизга ҳамдард бўлган ҳолда, “ҳозир бутун дунёда пандемия кетаётганини, аммо ўлим кўрсаткичлари бошқа давлатларга қараганда бизда анча ижобий эканини”, айтдилар. Бундан ташқари, шифокорларимизнинг меҳнатини ҳам алоҳида эътироф этиб ўтдилар. Шу билан бирга мендан келажакдаги орзуларим, режаларим ҳақида ҳам сўрадилар.
Ўзим Тошкент давлат педиатрия институтининг 3-курс магистратура битирувчисиман. Отам илмий иш қила олмаганлар, мени эса илмий иш қилишимни жуда хоҳлаган эдилар. Шу сабаб мана шу илм йўлига йўналтирганлар. Келаётган август ойида ректоримиз чақириб, бизга стажировка беришади ва шу орқали энди иш бошлайман. Шу гапларимнинг барчасини Алишер Шодмоновга етказдим.
У киши ректоримиз билан боғланиб, мен ҳақимда у кишига яхши таъриф бердилар. Димпломимни ёқлашимга, бунинг учун мавзу танлашда ўзлари ёрдам берадиган бўлдилар. Мен у кишига магистратурада ўқиётган талабалар ва бу босқични битирганларнинг режаси, яъни кўпроқ стажировкани йўлга қўйиш, хорижлик ҳамкасблар билан алоқалар қилиб туриш ҳақидаги фикрларимни қўллаб-қувватладилар.
Отам учун бериладиган компенсация масаласига тўхталар экан, вазир икки кун ичида бу масалани максимум ҳал этилишини айтдилар. Мутассаддилар бугуннинг ўзида ушбу маблағни етказиб беришди. У киши билан муаммо ва камчиликларни бирга ҳал этамиз деган хулосага келдик. Керакли ёрдам кўрсатамиз ва бу каби ҳолатларга бошқа йўл қўйилмайди, барчасини ўз назоратимга оламан дедилар.
Ижтимоий тармоқларда айтган гапларимдан мақсад Ўзбекистоннинг сиёсатига аралашиш ёки қоралаш эмас. Шу Ватанда ўсдим, шу юртда таҳсил олдим. Камчиликларимизни ошкор қилиб, муаммоларни ўз вақтида кўтариб чиқсак, камчиликларимиз йўқотилади, деган мақсадда гапирдим.
Жуда тушкун ҳолатга тушиб қолган эдим. Аммо вазиримизнинг ўзлари келганидан сўнг, руҳиятим кўтарилди. Биргина гапим билан ректоримизга қўнғироқ қилиб, илмий иш қилишимга йўналтирдилар. Эртага ўз илмим ва изланишларим билан менга ишонч билдирган барчанинг, давлатимизнинг, Президентимизнинг юзини ёруғ қилишга, Ўзбекистонимизга хизмат қилишга ваъда бераман.
Ана шундай оғир вазиятда фуқаролар дардини тинглаётган Президентимизга раҳматимни етказинг!" — деган марҳум шифокорнинг қизи.
