Аввал хабар берилганидек, сўнгги икки кун давомида коронавирусга қарши вакцина Россия ва Буюк Британияда омадли синовдан ўтказилгани маълум қилинди. Шунингдек, Хитой ўз вакцинаси бўйича Ўзбекистон билан ҳамкорлик қилиш таклифи билан чиққани ҳам хабар қилинди. Телеграмнинг платформа.уз каналида мазкур вакциналарнинг Ўзбекистонга олиб келиниши борасида муносабат ва қарашлар билдирилди:
"Ўтган ҳафта Президент видеоселекторда зўр бир гапни айтди: “Вакцина қаерда топилишидан қатъи назар, уни халқимиз учун, албатта, олиб келамиз!”. Бу одамларимиз учун ҳозирча ягона таскин. Бунинг учун давлат раҳбаридан миннатдор бўлса арзийди.
Лекин жамиятимизга худди чирмовуқдай ёпишиб олган, ҳар қадамда худди қадрдонларимиздек қарши оладиган коррупция деган иллат бор экан, саволлар кетидан саволлар туғилаверади.
Насиб этса, ҳадемай шу лаънати вирусга қарши вакцина сотувга ҳам чиқарилади. Хўш, ўшанда уни юртимизга ким олиб кириб, ким тарқатади?
Айни нуқтада яна бир қақшатқич монополистик хуружга дуч келамизов, деган хавотир ҳам йўқ эмас...
Агар унгача тутумларимиз ўзгариб кетмаса ва коррупция деган балонинг бутунлай бошига етиб қўймасак, вакцина жониворни олиб кириш ва тарқатиш ҳуқуқи қандайдир монополист компанияга лутфан тортиқ этилса керак.
Катта эҳтимол билан бу компания ҳозирнинг ўзида аллақайси хориж давлатида рўйхатдан ўтказилиб, устав жамғармасига 35 доллар атрофида чой чақа ташлаб қўйилган бўлса ҳам ажаб эмас. Буёғини энди кутамиз...." - дея тахмин қилинади муносабатда.
