Аввал хабар бергнимиздек, кеча, 18 декабрь куни Монополияга қарши курашиш қўмитаси ва “UzAuto Motors” ўртасидаги судда монопол компания яна ютиб чиқди.
Айни пайтга қадар “UzAuto Motors” фаолиятини кескин танқид қилиб келаётган депутат Расул Кушербаев сўнгги суд ишига ҳам ўз муносабатини билдирди.
"Ялло қилиб яшамоқчи бўлган барча монополистларга доим қаршимиз.
Антимонополия ва "Ўзавтомоторс" суди бугун тугади менимча. Муаммо эса қолди.
Бироқ бу муаммонинг тугашими ё бошланиши бу ёғини вақт кўрсатади.
Энди очиқ айтаман: нима бўлгандаям мен бу ишлардан рози эмасман ва буни ҳеч қачон унутмайман!
Кимсан ўзинг, дегувчиларга эса айтмоқчи бўлганим: биз ҳеч бўлмаса ўрмонга ўт кетганда уни ўчирмоқчи бўлиб, бир томчи сув олиб кетаётган ва шу ҳаракати билан ўзининг қайси томонда эканлигини кўрсатмоқчи бўлган камида бир чумолимиз.
Биз халқ кўзини шамғалат қилиб, яширин имтиёз ва ёлғонлар билан ялло қилиб яшамоқчи бўлган барча монополистларга доим қаршимиз. Ва биз монополиячилик, ёлғончилик ишларида ватанпарварликни, ғурурни кўрмаймиз.
Ватанпарварлик аввало мардлик ва ростликдир.
Ростакам ватанпарварлик ва ғурур ўлмасин ишқилиб", деб фикрини якунлаган депутат.
Эслатиб ўтамиз, Монополияга қарши курашиш қўмитаси томонидан “UZAUTOMOTORS” АЖда “Рақобат тўғрисида”ги қонун талаблари бузилиши бўйича қўзғатилган иш жорий йилнинг 19 август куни кўриб чиқилган эди.
Қўзғатилган ишнинг кўриб чиқилишида компаниядан бирор вакил қатнашмагач, иш охирида Монополияга қарши курашиш қўмитасининг махсус комиссияси “UZAUTOMOTORS” АЖ автомобиллар нархини 3 млндан 19 млн сўмгача тушириши кераклиги тўғрисида қарор қабул қилганди.
Шундан сўнг "UzAvto Motors” АЖ Монополияга қарши курашиш қўмитасининг қарори устидан Тошкент шаҳар маъмурий судига шикоят киритган эди.
2 октябрь куни Тошкент шаҳар маъмурий судида “UzAutoMotors” АЖнинг Монополияга қарши курашиш қўмитаси махсус комиссиясининг ишига оид қарорини ҳақиқий эмас деб топиш тўғрисидаги шикоят аризасини кўриб чиқиш бўйича бошланган суд жараёни Монополияга қарши курашиш қўмитасининг мағлубияти билан якун топган эди.
