Самарқандда хотинини муттасил калтаклаб келган ва унга мажбурлаб памперс едирган эркак Ш.К.га суд ҳукми ўқилиб, у 6 йилга озодликдан маҳрум қилингани ҳақида хабар бергандик.
Унинг адвокати Аракси Акуповна 20 декабрь куни видеомурожаат билан чиқиб, Мустаҳкам аслида етим эмаслигини маълум қилди.
Aдвокатнинг сўзларига кўра, аёл жуда катта ёлғон ишлатган. У Aқидаҳонимга айби етимлиги ва айнан шу сабаби эри уни доим камситиб, муттасил калтаклаб келишини айтган. Бироқ адвокат унинг етим эмаслигига доир ҳужжатлар тўплаганини таъкидлади. Ҳужжатларга асосан, унинг Ш.Б.Набиев исмли отаси бўлиб, онаси билан ажрашган бўлса ҳам доимо қизини таъминлаб келган.
Маълум қилинишича, унинг отаси Набиев қизи Мустаҳкам 2 ёшга тўлган вақтда онаси билан суд орқали қонуний ажрашган. Шунингдек, унинг отаси томондан 5 та ака-укаси, 3 та амакиси ва аммаси бор. Онаси томондан эса 10 нафар ўгай ака-синглиси ва 2 та тоға, 2 та холаси бўлиб, холаларидан бири Aмерикада яшайди.
«Ҳайратланарли, наҳотки ушбу етимнинг шунча қариндоши бўла туриб бирортаси уни қўллаб-қувватлаш учун суд жараёнига келмади», — дейди адвокат.
Шунингдек, адвокат Мустаҳкам нима сабабдан калтакланганига ҳам изоҳ берган:
«Менинг мижозим фақатгина мана шу ёлғонларни исботламоқчи эди. Тўғри, ҳатти-ҳаракатлари қонунга зид, буни инкор этмаймиз. Калтаклагани сабабига келсак, бунинг сабабини ҳам маълум қиламан. 2020 йил 20 август куни Мустаҳкам эрига айтмасдан ўгай акасининг тўйига кетади ва кечаси уйга қайтмайди. Бундай вазиятда эркаклар қандай ғазабланиши барчага аён. Aлбатта, у бундай қилиши керак эмасди».
Адвокат Мустаҳкамнинг отаси ёзган қуйидаги аризани келтириб ўтган:
«У қизлик даврида бир неча маротаба дорилар ичиб ўзига жабр қилмоқчи эди, шу йўл билан мени қўрқитарди. Қизим 17 ёшдалигида турмушга узатган эдим. Қизим ҳаётидан хурсанд эди. У 2013 йилда онаси Б.Н. билан пул сабабли жанжаллашиб, онасининг уйида кўп миқдорда дори ичиб ўзини ўлдирмоқчи бўлган. Aммо у бугунги кунда куёвимга ноҳақ айбловлар қўйяпти. Буни кўриб виждоним қийналяпти. Сабаби куёвим бу тухматларга лойиқ эмас. Мен уни яхши биламан, унга нисбатан қўйилган айбловлар ҳаммаси нотўғри. Куёвим бундай xатти-ҳаракатлари қилишига мен ишонмайман».
Эслатиб ўтамиз, интернетда Самарқанд шаҳрида яшовчи Мустаҳкам исмли аёлнинг доимий равишда турмуш ўртоғи томонидан калтакланиб келиши ҳақида видеолавҳалар тарқалди. Ушбу ҳолат жамоатчилик томонидан кескин муҳокама қилинмоқда. Ҳолат ўрганилиб, зўравон эр Тошкентда қўлга олингани хабар қилинган эди.
Давомли суд жараёнларидан кейин Жиноят ишлари бўйича Самарқанд шаҳар суди Ш.К. ни 6 йилга озодликдан маҳрум қилиш бўйича ҳукм чиқарди.
Мавзуга доир:
Самарқандда эри мажбурлаб памперс едирган ва доимий хўрлаб келинган аёлни ҳокимлик яраштирмоқчи
