Захар Прилепин собиқ СССР ҳудудларини Россия Федерацияси таркибига қўшиб олишни ва унинг аҳолисига рус тилини ўргатишни таклиф қилди - у муҳожирлар муаммосини шундай ҳал қилишга умид қилмоқда.
Маълум қилинишича, ёзувчи Москвада ўзининг "қўмондонлар кенгаши" фаолияти ҳақида матбуот анжумани ўтказган. Унда у келажак режалари ҳақида гапирди, Путиннинг бешинчи президентликка номзодини қўллаб-қувватлади ва тарафдорларининг саволларига жавоб берди. Улардан бири демографиядаги муаммолар ва мигрантлар билан можароларга бағишланди. Прилепиннинг таъкидлашича, бу муаммоларни ҳал қилиш учун кўпроқ бола туғиш керак: "Руслар қанча кўп бўлса, кўп сонли келган одамлар ўзини нотўғри тутиш билан боғлиқ муаммолар камроқ бўлади". Ёзувчининг қўшимча қилишича, мигрантларни Россияда эмас, балки улар келган давлатларда, масалан, Ўзбекистонда, ўқитиш керак.
“Мен ҳазиллашаётганим йўқ. Биз Совет Иттифоқининг парчаланишини рад этиш мавзусини кўтарамиз, бу бизга исталган вақтда айтишга имкон беради: “Бизнинг икки миллион фуқароларимиз сизнинг ҳудудингизда экан, биз сизнинг ҳудудингизга даъво қиламиз. Чунки кўпчилик аллақачон шу ерда, ҳаттоки бунга овоз беришган”, - дейди ёзувчи.
Эслатиб ўтамиз, аввалроқ, Ўзбекистон президенти маслаҳатчиси Қаҳрамон Қуранбоев Россия ҳукуматидан мамлакатда мигрант болалар учун боғча ва мактаблар очишга ёрдам беришни сўраганда Россия думаси депутати Михаил Делягин эса бу ташаббус ноқонуний эканлигини айтган эди.
"Фақат ўзбек болалар учун мактаблар очиш Россия фуқароларига нисбатан камситиш. Ўзбекистон, албатта, болалар боғчалари ва мактабларни қуриши керак, лекин фақат ўз ҳудудида", - деган эди рус депутати.
Рус ҳамкасбининг бу эътирозига жавобан Бобур Бекмуродов Россия уларни текинга боқмаётганини билдирган. Алишер Қодиров эса унда "Ўзбекистонда ҳам рус тилига муносабат шунга яраша бўлиши керак!" - деган эди.
Шунингдек, сал аввал Россия Давлат Думаси вице-спикери Пётр Толстой собиқ Совет иттифоқига кирган давлатларда, хусусан, Ўзбекистонда Россияда ишлаётган мигрантлар ҳисобидан рус тилида ўқитиладиган мактаблар қуришни таклиф қилди. Унга “Юксашиш” раҳбари, депутат Бобур Бекмуродов Толстойнинг бу таклифига жавоб қайтарди. Шунингдек, "Миллий тикланиш" партияси раҳбари Алишер Қодиров ҳам рус мулозимининг фикрларига ўз муносабатини билдирди.
