Жаҳон чемпионати ўйинларини жойидан туриб томоша қилишни режалаштирган ўзбекистонлик мухлисларнинг ярмидан кўпи АҚШ визасини олиш имкониятидан маҳрум бўлган. Бу ҳақда BBC нашри маълум қилди.
Нашрга кўра, мундиалда иштирок этаётган айрим мамлакатлар мухлисларининг катта қисми виза рад этилгани ёки амалдаги саёҳат чекловлари сабаб турнирга бориш имкониятидан маҳрум бўлган.
Таҳлиллар 2024 йил октябрь ойидан 2025 йил сентябрь ойи охиригача бўлган даврни қамраб олган. Шу боис кейинги саккиз ой мобайнида топширилган аризалар ҳисоботга киритилмаган.
Ҳисоботда Эквадор, Миср, Гаити, Жазоир, Ўзбекистон, Кабо-Верде, Иордания, Эрон, Конго Демократик Республикаси, Гана ва Сенегал каби 11 мамлакат фуқаролари бўйича маълумотлар таҳлил қилинган.
Натижаларга кўра, энг юқори рад этиш кўрсаткичи Сенегалда қайд этилган. Ушбу мамлакат фуқароларининг тахминан 80 фоизига виза бериш рад этилган. Кейинги ўринларни Гана ва Конго Демократик Республикаси эгаллаган.
Шунингдек, таҳлилларда ўзбекистонлик мухлисларнинг ҳам ярмидан кўпи АҚШ визасини олиш имкониятидан маҳрум бўлгани қайд этилган.
Маълумот учун, Ўзбекистон миллий терма жамоаси 18 июнь куни Жаҳон чемпионатидаги илк учрашувини Колумбияга қарши ўтказади. Беллашув Тошкент вақти билан соат 07:00 да Мексика пойтахтидаги “Ацтека” стадионида бўлиб ўтади.
Шундан кейин Темур Кападзе бошчилигидаги жамоа 23 июнь куни Португалия, 27 июнь куни эса Конго Демократик Республикаси терма жамоаларига қарши майдонга тушади.
