Бироқ Эрон томони ҳозирча ҳеч қандай якуний келишув расмийлаштирилмаганини билдирмоқда.
Трамп кеча, 11 июнь куни Оқ уйда журналистлар билан мулоқот чоғида АҚШ ва Эрон ўртасидаги музокаралар ижобий босқичга чиққанини таъкидлади.
“Биз Эрон билан урушни тугатиш бўйича жуда яхши келишувга эришдик”, деди АҚШ раҳбари.
Унинг сўзларига кўра, ҳужжатлар деярли якуний кўринишга келтирилган бўлиб, яқин кунларда Европада имзоланиши мумкин. Трамп, шунингдек, келишувнинг асосий мақсади Эроннинг ядровий қуролга эга бўлишига йўл қўймаслик эканини қайд этди.
“Эрон ҳеч қачон ядровий қуролга эга бўлмайди. Бу бутун жараённинг асосий мақсади эди”, деди у.
Шу билан бирга, Эрон Ташқи ишлар вазирлиги расмий вакили Исмоил Бақоий давлат телеканалига берган интервьюсида келишув ҳақидаги хабарларни “тахминий ва эрта хулоса” деб атади.
“Ҳозирча ҳеч нарса якунийлаштирилмаган”, деди Бақоий.
Унинг таъкидлашича, англашув меморандумининг катта қисми бўйича келишувга эришилган, аммо АҚШ томони музокаралар жараёнида қўшимча талаблар илгари сурган. Шу билан бирга, Теҳрон ўзининг “қизил чизиқлари”дан чекинмаслигини билдирган.
Қайд этиш жоиз, Трамп охирги ойларда бир неча бор Эрон билан тинчлик келишуви яқинлиги ҳақида баёнотлар берган. Хусусан, апрель ойида у келишув “тез орада” тузилишини айтган бўлса, май ойида музокаралар амалда якунланганини таъкидлаган. Бироқ шу вақтга қадар расмий келишув имзоланмаган.
Эътиборлиси, Трампнинг навбатдаги баёнотидан бир неча соат олдин у Эронга қарши янги зарбалар берилиши мумкинлигини билдирган эди. Шунингдек, АҚШ Эроннинг асосий нефть экспорт терминали ҳисобланган Харк ороли ва бошқа энергетика объектларини нишонга олиши мумкинлиги ҳақида ҳам огоҳлантирган.
Бу баёнотларга жавобан Эрон ҳарбийлари мамлакат нефть инфратузилмасига ҳужум қилинган тақдирда жавоб чоралари аввалгидан ҳам қаттиқ бўлишини маълум қилди.
Сўнгги ҳафталарда АҚШ ва Эрон ўртасидаги қарама-қаршилик яна кескинлашди. Томонлар бир неча марта ўзаро зарбалар алмашган. Вашингтон Эроннинг ҳарбий ва радар объектларига ҳужум қилган бўлса, Теҳрон ҳам АҚШнинг Яқин Шарқдаги ҳарбий базаларига қарши ракеталар ва учувчисиз аппаратлар орқали зарбалар берганини билдирмоқда.
Минтақадаги вазият кескинлашиб бораётган бир пайтда БМТ Бош котиби Антониу Гутерриш томонларни яна бир бор вазминликка чақирди. Шунингдек, Покистон, Россия, Хитой, Туркия, Ҳиндистон ва Саудия Арабистони ҳам можарони дипломатик йўл билан ҳал қилиш тарафдори эканини маълум қилди.
