“Навоий” чегара божхона постида йўлбарссимон бўғма илонни мамлакат ҳудудига ноқонуний олиб киришга уриниш ҳолати аниқланди. Бу ҳақда Божхона қўмитаси матбуот хизмати маълум қилди.
Маълум қилинишича, ушбу тур халқаро муҳофаза остида бўлиб, уни Ўзбекистон ҳудудига олиб кириш учун CITES халқаро рухсатномаси талаб этилади. Бироқ йўловчи тегишли ҳужжатларни тақдим эта олмаган.
Ҳозирда ҳолат юзасидан божхона органлари томонидан суриштирув ишлари олиб борилмоқда.
Қайд этилишича, илон белгиланган тартибда Тошкент ҳайвонот боғига топширилган ва унинг ҳолати қониқарли экани айтилган.
Маълумот учун, йўлбарссимон бўғма илон — йирик ўлчамли, захарсиз бўғма илонлар турига мансуб бўлиб, у ўз ўлжасини танаси билан ўраб, нафас олишини тўхтатиш орқали ов қилади. У асосан Марказий ва Жанубий Америка ҳудудларида учрайди ва узунлиги 2–4 метр, баъзан 5 метргача етиши мумкин.
Танасидаги ранг-баранг нақшлар йўлбарс терисига ўхшаши сабабли у “йўлбарссимон” деб номланган. У кемирувчилар, қушлар ва кичик сутемизувчилар билан озиқланади ҳамда тирик бола туғади.
