Конго Демократик Республикасида Эбола вирусининг тарқалиши кенгаймоқда. Мамлакатнинг янги ҳудудида ҳам касалликка гумон қилинган ҳолатлар аниқланиб, вирус қурбонлари сони 600 нафардан ошди. Бу ҳақда мамлакат ҳукумати 8 июль куни кечқурун эълон қилган сўнгги эпидемиологик ҳисоботда маълум қилди.
Ҳисоботга кўра, жорий йилнинг 15 май куни расман эълон қилинган эпидемия шу кунга қадар мамлакатнинг шарқий қисмида жойлашган Итури, Шимолий Киву ва Жанубий Киву провинцияларида 1 759 нафар кишида аниқланган.
Бироқ ушбу статистикага мамлакатнинг йирик шаҳарларидан бири ҳисобланган Кисанганида қайд этилган икки гумонли ҳолат ҳали киритилмаган. Чунки улар бўйича олинган таҳлил намуналари айни пайтда тасдиқловчи лаборатория текширувларидан ўтказилмоқда.
Расмийларга кўра, мазкур икки ҳолатдан бири Эболанинг дастлабки ўчоғи бўлган Итури провинциясидаги Ниания тиббий ҳудуди билан боғлиқ. Иккинчи ҳолат эса Кисанганидан ташқари бошқа ҳудудлар билан эпидемиологик боғлиқликка эга эмас.
Маҳаллий ҳокимият Кисанганида вирус тарқалишининг олдини олиш мақсадида касал билан мулоқотда бўлган шахсларни аниқлаш, кузатув ишларини кучайтириш ва санитария-эпидемиология чораларини янада қатъийлаштирган.
8 июль куни кечқурун эълон қилинган ҳисоботга мувофиқ, сўнгги бир сутка давомида 51 та янги касалланиш ҳолати ҳамда 20 та ўлим қайд этилган.
Жаҳон соғлиқни сақлаш ташкилоти эса эпидемия ҳозирча барқарорлашмаганини билдириб, аҳолининг фаол кўчиб юриши вируснинг янада кенг ҳудудларга тарқалиш хавфини ошираётганини таъкидлаган.
