Бугун журналист Алишер Рўзиохунов 22 дан 23 октябрга ўтар кечаси ички ишлар органлари ходимлари томонидан калтакланганлиги хақида хабар қилинган эди.
Шундан сўнг, Тошкент шаҳар ИИББ ҳолатга муносабат билдириб, воқеада иштирок этган барча ходимларнинг ҳамда журналист А.Рўзиохуновнинг хатти-ҳаракатларига ҳуқуқий баҳо берилишини маълум қилди.
Бугун ҳолат ижтимоий тармоқларда кенг муҳокама қилинмоқда. Жамоатчилик муносабат билдирмоқда. Хусусан, депутат Расул Кушербаев ҳам...
"Ички ишлар соҳасини ислоҳ қилиш керакми, деган савол сўнгги вақтларда кўп бора янграяпти. Хусусан куни кеча фуқаро Алишер Рўзиохунов билан йўл ҳаракати хавфсизлиги ходимлари ўртасида бўлиб ўтган ҳолат бу саволни яна кун тартибига олиб чиқмоқда.
Тўғриси А.Рўзиохуновнинг автомобилда ҳаракатланиши жараёнида қандай нотўғри ҳаракат қилганини билмайман, бироқ билганим шуки ҳар қандай ҳолатда бўлсин ички ишлар ходимига резина таёқ(дубинка) кучини кўрсатиш учун дуч келган фуқарони калтаклашга берилмаган.
Яна бир муҳим жиҳати шундаки, қонунларни қўллаш, ички ишлар ходимларининг фуқаролар билан муносабатларида шахснинг касби, ижтимоий мавқеи ва даражасига қараб эмас умумий мақом яъни, фуқаро тушунчаси орқали амалга оширилмаётганлиги тенглик принципининг қоғозда қолиб кетаётганлигини кўрсатмоқда. Масалан, кечаги вазиятда фуқаро Рўзиохунов калтакланиб сўнг унинг журналист эканлиги аниқлангач, «тинчлик поспонлари»нинг тарқаб кетгани ва ички ишлар масъулларининг фуқародан вазият учун узр сўрагани амалда ички ишлар ходимларининг фуқаролар билан муносабатда яққол нотенглик ва қонунсизликка йўл қўйишганлигини кўрсатмоқда.
Ўйлаб кўринг: агар шу ҳолатда журналист эмас прокурор ёки ҳоким бўлганида нима бўларди? Агар ишсиз ва ҳеч қанақа «таниши» йўқ фуқаро бўлсачи? Бу ёғини тасаввур қилиш қийинмас менимча.
Асосий муаммо шу ерда. Яъни ички ишлар соҳасида ислоҳ керак. Бу ислоҳ жамиятда қонун ва давлат хизматчиларига нафрат эмас, ҳурмат уйғотувчи профилактик ҳаракатлар мажмуидан иборат тизимдан иборат бўлиши лозим.
Кечаги бўлган ходисани эса ҳуқуқни мухофаза қилиш идоралари ҳатти-ҳаракатларига мос бўлмаган, абсурд иш, деб ҳисоблайман", - ўз муносабатини ёзиб қолдирган депутат.
Мавзуга доир:
Қонун барча учун баробар бўлиши керак — Саида Мирзиёева журналистнинг калтаклангани ҳақида
Журналист билан бўлган ҳолатдан хавотирдамиз ва вазиятни диққат билан кузатиб борамиз — Алламжонов
